Descrizione
Il percors al si svilupa tal teritori dal Comun di Siest, ta la frazion di Bagnarola, in sercli e in sens orari, dal centri da la localitàt mitùt in Plassa 4 novenbri (in duà ch’a è ància ‘na zona granda par parchegiâ) : al ciapa il via da la statua dedicada a Lionello “Natale” Fioretti, famòus pitòur, scultòur, restauradòur e poeta in furlan. Al para avant passant dòngia la Glesia di Dùcius i Sans (1) ch’a è dal Tresinta, e che dentri a ten da cont, tan chealtris, il Complant sul Crist Muart, preseàt afresc di Pomponi Amalteo. Un puc pi avant si ciata il Monumint dai Muars in Vuera (2) costruìt, cun precision, 100 ains fa. Il percors a si svilupa ta ‘na lungiessa totàl di circa 7.640 m caraterizàs da ‘na alternansa di stradis sfaltadis e stradis blancis, e a si pol passâ dut l’an, ància da chei ch’a àn dificultàs a mòvisi, dal moment ch’a no si ciàtin disnivèi. Ciapada via Borc di Sot, dopu su par zù 650 metros, a si volta a man sanca in via Sièa, in duà che al centri dal pissul borc a si pol amirâ ‘na vecia sièa venessiana. Parant avant a nord in pus minùs a si riva ta la via Casetis. Ciapant la destra, dopu altris 650 metros, a s’incrosa la via Venzon, e da lì si pol passâ di lunc il Lac Paker (3) infondàt ta n’oasi di biodiversitàt, destinassion di pes’ciadòurs sportifs. L’area a ciapa tre bacins artificiai, alimentàs da ‘na falda ch’a sta sot tiara, ades rinaturalizàs. Al zovin Pier Pauli Pasolini a ghi plaseva nodâ ta li’ aghis dal Paker, ch’al à nomenàt ància ta li’ sos còntis (La sisiluta dal Pacher). No tant lontan a si ciata la Fontana dal Vinciarèit (4), una pissula risultiva, afluente dal Lemit, ch’a furniva aga da bevi a li’ fameis ch’a stevin dòngia. A ven nomenada da Ipolit Nievo ta “Li’ confessions di un talian” e descrita cuma “un Paradis prin dal peciàt”. Uchì a si ciata un parc di machinis. Parant avant viars ovest par la cuièta strada blancia a si riva ta l’area di Borc Stalis (5), caraterizada da la presinsa di un mulin a aga e di ‘na serena e sugiestiva area verda ch’a à ‘na zona di sosta e parc pa li’ machinis. La costruzion dai mulins-incuoi post par fâ iniziativis culturals estemporaniis- a è stada fada tal timp medievàl; tal prinsipi dal 2000 a so finìs i lavòurs di restàur. Il percors al continuea fin a rivâ là da la Glesiuta dal San Pieri (6) nomenada ‘na prima volta ta un documint dal Papa Luci tal 1182. A era dal dut bandonada, in pùcis peraulis sdrumada, ma un grop di volontaris al à restaurada tal 1997. Ciaminant inciamò lunc la Via San Pieri a si torna a Bagnarola in duà ch’a è la statua di Fioretti percorìnt via Versola e via Tei: il timp in dut al è stimàt in dos òris.
(Traduzion par furlan dal poete Giacomo Vit)
(Percors pensàt cun la colaborazion dal grop podistic I Desperados ch’al cognòs benon il teritori)